စခန်းများ၊ ခိုလှုံရာနေရာများ သို့မဟုတ် ဘေးအန္တရာယ်ကျရောက်နေသော ဒေသများတွင် လူသားများ၏ အညစ်အကြေးများကို ဘေးကင်းစွာ မစီမံပါက ရောဂါများ အလျင်အမြန် ပျံ့နှံ့နိုင်ပါသည်။ အိမ်သာမရှိသည့်တိုင် ဤနည်းလမ်းများဖြင့် သန့်ရှင်းစွာနေထိုင်ကာ ကျန်းမာရေးကို ကာကွယ်နိုင်ပါသည်။
ပုံး ၂ လုံးနည်း (Two-bucket method)
ဆီးနှင့် မစင်ကို သီးခြားစီ စီမံရန် ပုံး ၂ လုံးကို အသုံးပြုပါ။
ပုံး ၁ - "အပေါ့"စွန့် ရန် အတွက်:
- ဆီးသွားရန်သာ အသုံးပြုပါ
- အသုံးပြုပြီး အိမ်သာသုံးစက္ကူကို မစင်ပုံးထဲထည့်ပါ
- မစင်နှင့် ရောမထားပါနှင့်
- ဆီးကို နေထိုင်ရာနေရာများမှ ဝေးရာတွင် သို့မဟုတ် မြေကြီးထဲစုပ်နိုင်သည့်နေရာ (ရေနှင့်နီးသောနေရာမဟုတ်) သို့ လောင်းချနိုင်ပါသည်
ပုံး ၂ - "အလေး" စွန့် ရန်အတွက်:
- ရရှိပါက ပလပ်စတစ်အိတ်ခံထားပါ
- အသုံးပြုပြီးတိုင်း ပြာ၊ အရွက် သို့မဟုတ် သစ်ဆွေးများဖြင့် ဖုံးအုပ်ပါ
- ပုံးတစ်ဝက်ပြည့်လျှင် အိတ်ကိုချည်ပြီး အသစ်လဲပါ
- အသုံးမပြုသည့်အချိန်တွင် ပုံးကိုဖုံးထားပါ
- မစင်အိတ်များကို အစားအစာ၊ ရေ၊ ကလေးများ၊ အိမ်မွေးတိရစ္ဆာန်များ၊ ယင်နှင့် ကြွက်များမှ ဝေးရာတွင် သိမ်းဆည်းပါ
ဤနည်းလမ်းသည် မှန်ကန်စွာလုပ်ဆောင်ပါက ပိုမိုသန့်ရှင်းပြီး စီမံရလွယ်ကူပါသည်။
တွင်းအိမ်သာ တူးခြင်း (ဖြစ်နိုင်လျှင်)
နေရာလုံလောက်ပြီး ကိရိယာများရှိပါက ရိုးရှင်းသော တွင်းအိမ်သာတူးခြင်းသည် ကောင်းသောရွေးချယ်မှုတစ်ခုဖြစ်သည်။
- တည်နေရာ: ရေအရင်းအမြစ်များ (ဥပမာ - ရေတွင်း) နှင့် လူနေအိမ်များမှ အနည်းဆုံး ၁၀၀ ပေ (၃၀ မီတာ) အကွာတွင် တူးပါ
- အနက်: ၂-၄ ပေ အနက်အထိ တူးပါ (ရေမြင်ပါက ရပ်လိုက်ပါ)
- အကျယ်: ၂ ပေခန့်ကျယ်သော တွင်းဖြစ်သင့်သည်
- အသုံးပြုပြီးတိုင်း အညစ်အကြေးကို မြေသို့မဟုတ် ပြာဖြင့်ဖုံးပါ
- သီးသန့်နေရာဖြစ်စေရန် အဝတ်/ခြင်ထောင်ဖြင့် ကာရံထားပါ
အရေးကြီးသော ဘေးကင်းရေး အကြံပြုချက်များ (နည်းလမ်းအားလုံးအတွက်)
- အိမ်သာများကို ရေအရင်းအမြစ်များမှ ဝေးရာတွင်ထားပါ
- မြစ်၊ အင်း၊ သောက်သုံးရေအနီးတွင် အလေးမစွန့်ပါနှင့်
- အိတ်များကို မြေမြှုပ်မထားပါနှင့်
- ခိုလှုံရာ၊ ချက်ပြုတ်ရာနှင့် ကလေးများကစားရာနေရာများအနီးတွင် အညစ်အကြေးမထားပါနှင့်
- ပုံးကို အလုံပိတ်အဖုံးမတပ်ပါနှင့်။ လေဝင်နိုင်စေခြင်းဖြင့် မစင် များ ခြောက်သွေ့ပြီး ထုထည်လျော့နည်းစေသည်
- ပုံးကို တစ်ဝက်ထက် ပိုမဖြည့်ပါနှင့်
- အလေးအိတ်များ၊ တိရစ္ဆာန်အညစ်အကြေးနှင့် အသုံးပြုပြီး အနှီးများကို အခြားအမှိုက်များနှင့် ရောမထားဘဲ သီးခြားစီထားပါ
- ကလေးများကို အသုံးပြုပြီးအလေးအိတ်များ သို့မဟုတ် ဖွင့်ထားသော အိမ်သာနေရာများမှ ဝေးဝေးထားပါ
- မစင်နှင့်ထိတွေ့နိုင်သော မျက်နှာပြင် (ဥပမာ - အိမ်သာခုံ) သည် ရေစုပ်မထားသော၊ သန့်စင်ရလွယ်သည့် ပစ္စည်းဖြင့် ပြုလုပ်ထားသင့်သည်
- အိမ်သာသုံးပြီးတိုင်း လက်ကိုအမြဲဆေးကြောပါ