ပါဝင်သောအကြောင်းအရာများ
- ရေဓာတ်ခန်းခြောက်မှု၏ လက္ခဏာများ
- တစ်စုံတစ်ဦး၏ ရေဓာတ်ခန်းခြောက်မှုအခြေအနေကို စစ်ဆေးနည်း
- အလယ်အလတ်ရေဓာတ်ခန်းခြောက်ခြင်းအတွက် ORS ပမာဏ
- ရေဓာတ်ခန်းခြောက်မှုကာကွယ်ခြင်း/အနည်းငယ်ဝမ်းလျှောခြင်းအတွက် ORS တိုက်နည်း
- ORS ကိုကိုယ်တိုင်ဖျော်စပ်နည်း
- ကလေးငယ်များအတွက် အထူးညွှန်ကြားချက်များ
- ဆေးကုသမှု ချက်ချင်းခံယူရမည့် အခြေအနေများ
- ရေဓာတ်ခန်းခြောက်ခြင်း ကာကွယ်နည်းများ
ငလျင်ကဲ့သို့သော သဘာဝဘေးအန္တရာယ်များတွင် လူများသည် ဝမ်းလျှောခြင်း၊ အန်ခြင်း သို့မဟုတ် အဖျားရှိခြင်းတို့ကြောင့် နာမကျန်းဖြစ်နိုင်ပါသည်။ ဤအခြေအနေများသည် အထူးသဖြင့် သန့်ရှင်းသောရေရှားပါးသည့်အခါတွင် ရေဓာတ်ခန်းခြောက်မှုကို အလျင်အမြန်ဖြစ်စေနိုင်ပါသည်။
ဤလမ်းညွှန်ချက်သည် သင့်အား ကူညီနိုင်မည်ဖြစ်သည်:
- ရေဓာတ်ခန်းခြောက်မှု၏ လက္ခဏာများကို သိရှိရန်
- ORS (ဓာတ်ဆားရည်) ၏ မှန်ကန်သောပမာဏကို ပေးနည်း
- ဆေးခန်း သို့မဟုတ် ဆေးရုံသို့ မည်သည့်အချိန်တွင် သွားရမည်ကို သိရှိရန်
ရေဓာတ်ခန်းခြောက်မှု၏ လက္ခဏာများ
ကလေးများနှင့် လူကြီးများတွင်:
- ရေငတ်ခြင်း
- ဆီးအရောင်ရင့်ပြီး အနံ့ပြင်းခြင်း
- ပုံမှန်ထက် ဆီးနည်းခြင်း
- ခေါင်းမူးခြင်း၊ ခေါင်းပေါ့ခြင်း သို့မဟုတ် ပင်ပန်းနွမ်းနယ်ခြင်း
- ပါးစပ်၊ နှုတ်ခမ်းနှင့် လျှာခြောက်ခြင်း
- မျက်လုံးချိုင့်ဝင်ခြင်း
ကလေးငယ်များတွင်:
- ဦးခေါင်းပေါ်ရှိ နူးညံ့သောနေရာ (fontanelle) ချိုင့်ဝင်ခြင်း
- မျက်လုံးချိုင့်ဝင်ခြင်း
- ငိုသည့်အခါ မျက်ရည်နည်းခြင်း သို့မဟုတ် မထွက်ခြင်း
- ဆီးသွားနည်းခြင်း
- ငိုက်မျဉ်းခြင်း သို့မဟုတ် စိတ်တိုလွယ်ခြင်း
တစ်စုံတစ်ဦး၏ ရေဓာတ်ခန်းခြောက်မှုအခြေအနေကို စစ်ဆေးနည်း
ဤသည်များသည် ရေဓာတ်ခန်းခြောက်မှု၏ လက္ခဏာအားလုံးမဟုတ်ပါ — ပါးစပ်ခြောက်ခြင်း၊ ပင်ပန်းနွမ်းနယ်ခြင်း၊ ဆီးနည်းခြင်း ကဲ့သို့သော ရှေ့ပြေးလက္ခဏာများ ပထမဦးစွာပေါ်လာနိုင်ပါသည်။
တစ်စုံတစ်ဦး ရေဓာတ်ခန်းခြောက်နေသည်ဟု သံသယရှိပါက ORS ကို ချက်ချင်းတိုက်ပါ။ အောက်ပါဇယားများသည် မည်မျှနှင့် မည်မျှအရေးတကြီးလိုအပ်သည်ကို ဆုံးဖြတ်ရာတွင် ကူညီပေးပါလိမ့်မည်။
🔴 ပြင်းထန်ရေဓာတ်ခန်းခြောက်ခြင်း – အရေးပေါ်အကူအညီလိုအပ်ပါသည်
| လက္ခဏာများ | စစ်ဆေးရန်နည်းလမ်း |
|---|---|
| အလွန်အားနည်းခြင်း သို့မဟုတ် သတိလစ်ခြင်း | ထိုင်၍မရ၊ စကားမပြောနိုင်၊ တုံ့ပြန်မှုမရှိ |
| မျက်လုံးအလွန်ချိုင့်ဝင်ခြင်း | မျက်လုံးများ နက်ရှိုင်းစွာချိုင့်ဝင်နေခြင်း |
| အရည်မသောက်နိုင်ခြင်း | ငြင်းဆန်ခြင်း သို့မဟုတ် အန်ထုတ်ခြင်း |
| အရေပြားဆွဲဆန့်စစ်ဆေးခြင်း (လက်ဖမိုးရှိ အရေပြားကို ညင်သာစွာဆွဲယူပြီး ပြန်လွှတ်ပါ) | အရေပြားပြန်မဆန့်ခြင်း (၂ စက္ကန့်ထက်ပိုကြာ) |
| အားနည်းသောနှလုံးခုန်နှုန်း | လက်ကောက်ဝတ်တွင် နှလုံးခုန်နှုန်းမခံစားရခြင်း |
❗ ဆေးခန်း/ဆေးရုံသို့ အမြန်သွားပါ - သွေးကြောထဲသို့အရည်သွင်းကုသမှုလိုအပ်ပါသည်။သတိရှိပါက ORS တိုက်ပါ။
လက္ခဏာ ၂ ခုထက်ပိုရှိပါက ကုသမှုစတင်ပါ။
🟡 အလယ်အလတ်ရေဓာတ်ခန်းခြောက်ခြင်း – ORS ကိုအခုပဲစတင်တိုက်ပါ!
| လက္ခဏာများ | စစ်ဆေးရန်နည်းလမ်း |
|---|---|
| စိတ်တိုလွယ်ခြင်း | ဂနာမငြိမ်ဖြစ်ခြင်း၊ ငိုခြင်း၊ မတည်ငြိမ်ခြင်း |
| မျက်လုံးချိုင့်ဝင်ခြင်း | မျက်လုံးများ နက်ရှိုင်းစွာချိုင့်ဝင်နေခြင်း |
| အလွန်ရေငတ်ခြင်း | ရေကိုအငမ်းမ ရသောက်ခြင်း |
| အရေပြားဆွဲဆန့်စစ်ဆေးခြင်း (လက်ဖမိုးရှိ အရေပြားကို ညင်သာစွာဆွဲယူပြီး ပြန်လွှတ်ပါ) | ဝမ်းဗိုက်ကိုညှစ်ကြည့်ပါက အရေပြားနှေးကွေးစွာပြန်ဆန့်ခြင်း (၂ စက္ကန့်အတွင်း) |
✅ ORS ကိုအခုပဲ ၄ နာရီကြာတိုက်ပါ။ အောက်ပါဇယားကိုအသုံးပြုပါ။
အလယ်အလတ်ရေဓာတ်ခန်းခြောက်ခြင်းအတွက် ORS ပမာဏ
ORS ပမာဏသည် အသက်အရွယ်၊ ကိုယ်အလေးချိန်နှင့် ရေဓာတ်ခန်းခြောက်မှုအဆင့်ပေါ်မူတည်ပါသည်။
အောက်ပါဇယားများကို အသုံးပြု၍ မည်မျှတိုက်ရမည်နှင့် မည်သည့်အချိန်တွင် တိုက်ရမည်ကို သိရှိပါ။
🟡 အလယ်အလတ်ရေဓာတ်ခန်းခြောက်ခြင်းအတွက် ORS တိုက်နည်း:
ORS ကို ၄ နာရီအတွင်း တဖြည်းဖြည်းချင်းတိုက်ပါ:
| အသက် | ခန့်မှန်းကိုယ်အလေးချိန် | ၄ နာရီအတွင်း ORS ပမာဏ (၁ ခွက် = ၂၀၀ မီလီလီတာ) |
|---|---|---|
| ၄ လအောက် | ၅ ကီလိုအောက် | ၁-၂ ခွက် (၂၀၀-၄၀၀ မီလီလီတာ) |
| ၄-၁၁ လ | ၅-၇.၉ ကီလို | ၂-၃ ခွက် (၄၀၀-၆၀၀ မီလီလီတာ) |
| ၁၂-၂၃ လ | ၈-၁၀.၉ ကီလို | ၃-၄ ခွက် (၆၀၀-၈၀၀ မီလီလီတာ) |
| ၂-၄ နှစ် | ၁၁-၁၅.၉ ကီလို | ၄-၆ ခွက် (၈၀၀-၁၂၀၀ မီလီလီတာ) |
| ၅-၁၄ နှစ် | ၁၆-၂၉.၉ ကီလို | ၆-၁၁ ခွက် (၁၂၀၀-၂၂၀၀ မီလီလီတာ) |
| ၁၅+ နှင့် လူကြီး | ၃၀+ ကီလို | ၁၁-၂၀ ခွက် (၂၂၀၀-၄၀၀၀ မီလီလီတာ) |
🕒 ၄ နာရီပြည့်ပါက ပြန်စစ်ဆေးပါ
- ၄ နာရီအကြာတွင် သက်သာလာပါက → ရေဓာတ်မဆုံးရှုံးစေရန် ဝမ်းတစ်ကြိမ်သွားတိုင်း ORS တိုက်ပါ။ အထက်ပါ "ရေဓာတ်ခန်းခြောက်မှုကာကွယ်ခြင်း" လမ်းညွှန်ချက်အတိုင်းလိုက်နာပါ။
- ၄ နာရီအကြာတွင် ရေဓာတ်ခန်းခြောက်သည့်လက္ခဏာများ ဆက်ရှိနေပါက →အလားတူ ORS ပမာဏကို ထပ်မံတိုက်ပါ။
- ❗ပိုဆိုးလာပါက (သောက်ရန်အားမရှိ၊ အလွန်အိပ်ငိုက်၊ တုံ့ပြန်မှုမရှိ) → ဆေးခန်းကို အမြန်သွားပါ!
ရေဓာတ်ခန်းခြောက်မှုကာကွယ်ခြင်း/အနည်းငယ်ဝမ်းလျှောခြင်းအတွက် ORS တိုက်နည်း
ORS ပမာဏသည် အသက်အရွယ်၊ ကိုယ်အလေးချိန်နှင့် ရေဓာတ်ခန်းခြောက်မှုအဆင့်ပေါ်မူတည်ပါသည်။
အောက်ပါဇယားများကို အသုံးပြု၍ မည်မျှတိုက်ရမည်နှင့် မည်သည့်အချိန်တွင် တိုက်ရမည်ကို သိရှိပါ။
🟢 ရေဓာတ်ခန်းခြောက်မှုကာကွယ်ခြင်း/အနည်းငယ်ဝမ်းလျှောခြင်းအတွက် ORS တိုက်နည်း
(ရေဓာတ်ခန်းခြောက်သည့်လက္ခဏာများ မပြသေးပါက)
ဝမ်းတစ်ကြိမ်သွားတိုင်း ORS တိုက်ပါ:
| အသက် | တစ်ကြိမ်တိုက်ရန် ORS ပမာဏ |
|---|---|
| 👶၂ နှစ်အောက် | ၅၀-၁၀၀ မီလီလီတာ (၁၀-၂၀ စားပွဲ ဇွန်း) |
| 🧒 ၂-၁၀ နှစ် | ၁၀၀-၂၀၀ မီလီလီတာ (၁/၂-၁ ခွက်) |
| 👨 ၁၀ နှစ်အထက် နှင့် လူကြီး | ၂၀၀-၄၀၀ မီလီလီတာ (၁-၂ ခွက်) |
ORS ကိုကိုယ်တိုင်ဖျော်စပ်နည်း
အသင့်သုံး ORS အိတ်ရှိပါက - အိတ်ပေါ်ရှိညွှန်ကြားချက်အတိုင်း ရေနှင့်ရောဖျော်ပါ။
ORS အိတ်မရှိပါက - အိမ်တွင်လွယ်ကူစွာဖျော်စပ်နိုင်ပါသည်:
သန့်ရှင်းသောခွက်ထဲတွင်:
- သန့်ရှင်းသောရေ ၁ လီတာ(ရေမသန့်ပါက ကျိုချက်အေးစေပါ - အထူးသဖြင့်ကလေးငယ်များအတွက်)
- ဆား ၁/၂ လက်ဖက်ရည်ဇွန်း
- သကြား လက်ဖက်ရည် ဇွန်း ၆ဇွန်း
- ပါဝင် ပ စ္စည်းများ အားလုံးပျော်ဝင်သည်အထိ မွှေပါ
- အရသာသည် မျက်ရည်ကဲ့သို့ အနည်းငယ်ငန်ရမည်
- သာမန်ရေအစား ဆန်ဆေးရေ သုံးနိုင်သည်
- အရသာကောင်းစေရန် သစ်သီးဖျော်ရည် (သို့) ငှက်ပျောသီးအနှစ် အနည်းငယ်ထည့်နိုင်သည် (မဖြစ်မနေ မလိုအပ်ပါ)
- ဝမ်းတစ်ကြိမ်သွားတိုင်း နည်းနည်းချင်းစီတိုက်ပါ
- ORS ကို ဖျော်ပြီးပြီးချင်း တိုက်ပါ၊ ၈ နာရီအတွင်းသာသုံးပါ
- ချက်ချင်းအာနိသင် ရနိုင်ပြီး၃-၄ နာရီအတွင်း ရေဓာတ်ပြန်လည်ဖြည့်တင်းပေးနိုင်သည်
- အန်ပါက ၁၀ မိနစ်ခန့်ရပ်ပြီး နည်းနည်းချင်းစီ ဆက်တိုက်ပါ .
ကလေးငယ်များအတွက် အထူးညွှန်ကြားချက်များ
- မိခင်နို့/ဖော်မြူလာနို့ ကို ပုံမှန်ထက် ပိုမိုတိုက်ပါ
- နို့မှုန့်ကို ရေပိုရော၍မတိုက်ရ
- အစာစားနိုင်ပါက သန့်ရှင်းသောရေနှင့် ORS ကို နည်းနည်းချင်းစီမကြာခဏတိုက်ပါ
- အားဖြည့်အချိုရည်၊ ဆိုဒါ၊ သစ်သီးဖျော်ရည်များ ရှောင်ပါ- လ က္ခဏာများပိုဆိုးနိုင်သည်
- ဇွန်း (သို့) ဆေးထိုးပြွန်ဖြင့် နည်းနည်းချင်းစီတိုက်ပါ
ဆေးကုသမှု ချက်ချင်းခံယူရမည့် အခြေအနေများ
❗ အောက်ပါလက္ခဏာများရှိပါက အရေးပေါ်ဆေးကုသမှုခံယူပါ -
- အလွန်ပင်ပန်း၊ ငိုက်မျဉ်း သို့မဟုတ် စိတ်ရှုပ်ထွေးနေပါက
- ၁-၂ ရက်ကြာသည်အထိ မသက်သာပါက
- အရည်မသောက်နိုင်/အဆက်မပြတ်အန်နေပါက
- ဆီးအရောင်ရင့်ခြင်း သို့မဟုတ် ဆီးနည်းခြင်း (ကလေးငယ်များတွင် ဆီးသွားနည်းခြင်း)
- အသက်ရှူမြန်/နှလုံးခုန်မြန်ခြင်း
- ကလေးငယ်တွင် မျက်လုံးချိုင့်ဝင်ခြင်း သို့မဟုတ် ဦးခေါင်းပေါ်ရှိ နူးညံ့သောနေရာချိုင့်ဝင်ခြင်း
- ကလေးငယ်ငိုသည့်အခါ မျက်ရည်မထွက်ခြင်း
- မတ်တတ်ရပ်လျှင် ခေါင်းမူးခြင်း (ပျောက်မသွားပါက)
ရေဓာတ်ခန်းခြောက်ခြင်း ကာကွယ်နည်းများ
- ရေများများသောက်ပါ (အထူးသဖြင့် ပူအိုက်သောရာသီနှင့် နေမကောင်းစဉ်)
- ရေဓာတ်ပါသောအစားအစာများ (ဥပမာ - စွပ်ပြုတ်၊ သစ်သီးများ) စားပါ
- ကလေးများနှင့် သက်ကြီးရွယ်အိုများကို မတောင်းသည့်တိုင် မကြာခဏရေတိုက်ပါ
- အလွန်ပူပြင်းသောရာသီတွင် ချွေးထွက်များခြင်းသည် အပူဒဏ်ကြောင့်မောပန်းခြင်းနှင့် အပူလျှပ်ခြင်း ကဲ့သို့သော ပြင်းထန်သည့်အခြေအနေများကို ဖြစ်စေနိုင်ပါသည်။ ။ အပူဒဏ်ကြောင့်မောပန်းခြင်းနှင့် အပူလျှပ်ခြင်း -သတိပြုရမည့်လက္ခဏာများနှင့် ဘာလုပ်ရမည်ကို page.တွင် ဖတ်ရှုပါ
ရေဓာတ်ခန်းခြောက်ခြင်းဆိုင်ရာ နောက်ထပ်အချက်အလက်များအတွက် ရေဓာတ်ခန်းခြောက်ခြင်းလမ်းညွှန် ကို ဤနေရာတွင် ကြည့်ရှုပါ။